Давід–Гарадок. Замкавая гара.

Калі завітаеце ў Давід–Гарадок, то машыну лепш прыпаркаваць у гістарычным цэнтры на былой Гандлёвай плошчы каля царквы Казанскай Божай Маці. Да Замкавай гары з плошчы вядзе Замкавая вуліца.

 Калі прыйдзеце на замчышча, або часам яго ў крыніцах называюць гарадзішча, то пабачыце, што з гэтай мясціны адкрываецца незвычайна прыгожая панарама ўсяго мястэчка і ракі Гарынь. Калі быць больш дакладнымі, то перад вамі не сама рака, а яго старое рэчышча.

 Замак, як лічаць даследчыкі, існаваў на гэтым месцы ў перыяд Вялікага Княства Літоўскага ў перыяд 14 – 18 стагоддзяў. А замку папярэднічала гарадзішча 11 – 12 стагоддзяў.

Замак быў драўляны з трыма вежамі і земляным валам. Была створана сістэма водных прыград: выкапаны роў, які запаўняўся вадой і сістэма рэгулявалася шлюзамі. Быў Верхні і Ніжні замак. Агульная працягласць замкавых умацаванняў складала прыкладна 1 кіламетр.

Замак быў знішчаны ў час вайны ў сярэдзіне 17 стагоддзя паміж Рэччу Паспалітай і Царствам Маскоўскім. Адноўлены напрыканцы 17 стагоддзя. У 1690 – я гады ў цэнтры Верхняга замка быў пабудаваны драўляны палац у стылі барока і гаспадарчыя пабудовы. У палацы планіроўка была анфіладная і было каля 10 пакояў. Замак моцна пацярпеў у Паўночную вайну і канчаткова страціў свае абарончае значэнне ў сярэдзіне 18 стагоддзя.

На Замкавай гары праводзіліся археалагічныя раскопкі ў часы Польскай дзяржавы ў 1930 – я гады і ў часы СССР. Замкавая гара мае статус помніка археалогіі рэспубліканскага значэння. На помніку ўсталяваны ахоўны знак.