Старая Мыш. Замкавая гара.

У Баранавіцкім раёне паміж мястэчкамі Новая Мыш і Старая Мыш ёсць замкавая гара, дзе калісьці ў часы Вялікага Княства Літоўскага быў вядомы замак, які лічыцца радзімай выбітнага беларускага палкаводца Яна Караля Хадкевіча.

Замак быў пабудаваны ў 16 - 17 стагоддзях на высокім правым беразе ракі Мышанка. У плане меў форму квадрата 50 на 50 метраў. Акружаны абарончым земляным валам шырыня якога сягае 15 метраў, а вышыня чатыры метра. Таксама ёсць абарончы роў: шырыня 30, а глыбіня 15 метраў.

Каля замка маецца балоцісты бераг ракі, які служыў натуральнай абарончай перашкодай. На земляным валу былі пабудаваны драўляныя сцены з чатырма вежамі па кутах. У час вайны паміж Рэччу Паспалітай і царствам Маскоўскім у 1654 – 1667 гадах замак пасля аблогі быў узяты расійскімі войскамі і знішчаны. Вось, як дакладалі цару Аляксею Міхайлавічу пасля падзення замка: «В городе Мыши литовских людей всех побили, которых застали, и языков взяли многих людей. И городок Мышь выжгли и со всем разорили без остатку…». Частке гарнізона, які абараняў замак, удалося адступіць.

Лічыцца, што менавіта ў гэтым мястэчку нарадзіўся выбітны беларускі палкаводзец і дзяржаўны дзеяч Ян Караль Хадкевіч (1560 - 1621). Хадкевіч меў тытул граф «на Шклове, Мышы і Быхаве». Гетман вялікі Літоўскі, ваявода Віленскі. З роду Хадкевічаў герба «Касцеша». Яшчэ пры жыцці быў праслаўлены як выбітны палкаводзец. Яго партрэт напісаў вядомы фламандскі мастак Антоніс Ван Дэйк.