Вялае. Руіны сядзібы графа Тышкевіча.

У пачатку 19 стагоддзя, калі Тышкевічы пабудавалі вялікі палац і сядзібу ў Валожыне, яны ў Налібоцкай пушчы заснавалі сваю паляўнічую рэзідэнцыю ў Вялым.

У Валожынскім раёне каля вёскі Рудня засталіся руіны былой паляўнічай сядзібы Тышкевічаў. Але нават і гэтыя руіны ўражваюць. Сядзіба Вялае знаходзіца на беразе ракі Іслач у 20 кіламетрах ад Валожына.

 У 1840 годзе Бенядзіктам Тышкевічам (1801 – 1866) тут будуеца драўляны палац, а крыху пазней яшчэ адзін драўляныя палац. Будынкі гэтыя згарэлі ў 1890- я гады і Бенядзіктам Генрыхам Тышкевічам (1852 – 1935) будуецца вялікі мураваны будынак у некалькі паверхаў, парэшткі якога захаваліся да нашага часу.

Тышкевіч спачатку жыў у Францыі, а пасля смерці жонкі вырашыў жыць бліжэй да  дзікай прыроды ў Налібоцкай пушчы і перабраўся ў сядзібу ў Вялае. У будынку ён наладзіў фоталабараторыю і вельмі любіў фатаграфаваць мясцовых сялян. Затым сядзібай займаецца яго сын Бенядзікт Ян Тышкевіч, які быў вялікім аматарам палявання. У гэты час у сядзібе ствараецца вялізны звярынец на 400 гектараў. У Тышкевічаў быў свой прыватны аўтамабіль, адзін з першых на Беларусі, і сюды ў Вялае яны прыязжалі на сваім аўто.

У часы Першай сусветнай вайны сядзіба моцна была пашкоджана і разрабавана. За польскім часам улады аднавілі звярынец. У гады Вялікай Айчыннай вайны згарэў мураваны шматпавярховы будынак, які і дагэтуль знаходзіцца ў руінах.

Некалькі год таму ў Мінску была арганізавана фотавыстава Бенядзікта Тышкевіча.

Побач з сядзібай Тышкевічаў знаходзіцца былы санаторый, які зачынілі пасля Чарнобыльскай катастрофы.