Пяршаі. Касцёл Святога Юрыя і Маці Божай.

Мястэчка Пяршаі знаходзіцца ў некалькіх кіламетрах ад Валожына, калі ехаць па трасе з Мінску. Упершыню ў дакументах Пяршаі ўпамінаюцца ў 15 стагоддзі і назва паходзіць ад рачулкі Пяршайкі. У тыя часы мястэчка належыла каталіцкаму касцёлу і ў 1493 годзе было маёмасцю вілінскага біскупа Войцэха. У 16 стагоддзі ўпамінаецца першы касцёл.

 Пасля другога падзелу Рэчы Паспалітай мястэчка знаходзіцца ў складзе Расійскай імперыі і тут меліся касцёл, плябанія, 2 вадзяныя млыны і карчма. У 19 стагоддзі само мястэчка належыла графу Тышкевічу. Першапачаткова касцёл быў драўляны з двухвежавым фасадам. Вежы былі двухярусныя чацвярыковыя. Перад касцёлам была званіца драўляная таксама двухярусная.

 Мураваны касцёл пабудаваны на цэнтральнай  плошчы ў гады Польскай дзяржавы ў 1933 годзе. Храм узведзены за сродкі графа Бенедзікта Тышкевіча.

 У часы гітлераўскай акупацыі разам з мясцовымі жыхарамі былі забітыя ксянзы Герман і Ахілес. Святары маглі выратавацца, але вырашылі застацца са сваімі прыхаджанамі ў такі трагічны момант. Каля касцёла святарам усталяваны памятны валун.

Пасля вайны касцёл быў зачынены. Будынак перабудаваны, а вежы разабраны. З развалам СССР храм вернуты каталіцкім вернікам. Праведзена рэканструкцыя храма.

 Будынак прамавугольны ў плане, трохнефны, накрыты двухсхільным дахам. На галоўным фасадзе надбудаваны 2 васьмерыковыя вежы – званіцы.