Валожын. Капліца Узнясення Гасподняга

Пры набліжэнні да горада Валожына з боку МІнска ў самым прыгарадзе, знаходзяцца старажытныя могілкі. Тут на пагорку ўзвышаецца высокі мураваны праваслаўны храм Узнясення Гасподняга. Будынак узведзены ў 1850 годзе па фундацыі графа Тышкевіча.

 Род Тышкевічаў быў вельмі заможны і ўплывовы ў тыя часы. Гэта беларускія магнаты, якія мелі ў Валожынскім краі вялікія зямельныя ўладанні. У самім Валожыне пабудавалі ў 19 стагоддзі сваю рэзідэнцыю з палацам і касцёлам, якія захаваліся да нашага часу. Тышкевічы рабілі вельмі шмат для самога горада  Валожына і гэтага краю. Капліца будавалася першапачаткова, як каталіцкі храм, які праз некалькі год перадалі праваслаўным вернікам. Капліца належыла каталіцкаму ордэну бернардзінцаў.

 Будынак пабудаваны кампактна ў спрошчаных формах. Капліца ў плане прамавугольны аб'ём, які накрыты вальмавым дахам. Над прытворам узведзена трохярусная вежа званіца васьмярык над чацвярыком, якая завершана пазалочаным купалам з цыбулінай. Першапачаткова вежа была двухярусная са шпілем. Над асноўным аб'ёмам надбудаваны васьмігранны барабан з пазалочаным купалам і цыбулінай. Будынак узведзены з элементамі класіцызму і неабарока. Над парталам размешчаны дэкор і крыж у выглядзе барэльефа. Царква ў апошнія гады была адрамантавана і перабудавана. Усталяваныя пазалочаныя купала з цыбулінамі, што надала будынку і рысы псеўда – рускага стылю