Экалагічная сцежка "Белакорац".

Экасцежка "Белакорац" знаходзіцца ўсяго ў гадзіне язды ад Мінска. Гэта астравок даступнасці ў бязмежным зялёным моры Налібоцкай пушчы, дзе 80% тэрыторыі займаюць густыя, часам непраходныя лясы і вы апыняецеся ў самым сэрцы найбуйнейшага ляснога масіву Беларусі. Маршрут працягласцю 1,3 км пралягае па маляўнічай мясцовасці, дзе вас чакаюць альтанкі і камфортныя лаўкі, біяпрыбіральні, а таксама абсталяванае месца для кэмпінгу і прасторная аўтамабільная стаянка ля ўваходу.

Шпацыр па "Белакорцы" - гэта апусканне ў свет хваёвых, яловых і змешаных лясоў. Тут вы зможаце атрымаць асалоду ад прыгажосці адной з самых чыстых рэк Беларусі – Іслачы, а ў гарачы дзень нават акунуцца ў яе прахалодныя воды. Тутэйшая прырода вельмі прыгожая, таму не забудзьцеся зрабіць уласныя фатаграфіі і падзяліцца імі з сябрамі!

Інтэрактыўныя стэнды на сцежцы "Белакорац" – гэта сапраўдная скарбніца ведаў і забаў. Яны раскажуць аб правілах наведвання сцежкі, пазнаёмяць з насельнікамі пушчы.

Экасцежка створана ў рамках праекта "Валожын без межаў", каб кожны жадаючы мог атрымаць асалоду ад прыгажосці Налібоцкай пушчы. "Белакорац" - гэта першая і адзіная Інклюзіўная экасцежка ў сваім родзе. Роўнае шырокае пакрыццё з гранітнай крошкі дазваляе камфортна перасоўвацца людзям з асаблівымі патрэбамі, пажылым людзям і бацькам з каляскамі. А інфармацыя на стэндах прадубляваная шрыфтам Брайля.

"Белакорац" пракладзены праз найбольш чысты ўчастак лесу. Усе аб'екты на сцежцы зроблены з экалагічна чыстых матэрыялаў, якія не шкодзяць навакольнаму асяроддзю.

Невялікія дэталі ў стылі ленд-арт і сэнсарная сцежка, якая дазваляе адчуць лес нагамі, ствараюць непаўторную атмасферу. Тут воляй-няволяй пачынаеш прыглядацца да дробязяў і заўважаць прыгожае ў навакольным свеце.

Наведаўшы "Белакорац", вы зможаце адкрыць для сябе новыя грані адпачынку на прыродзе! Ёсць паслуга суправаджэння гідам-біёлагам, які раскажа шмат новага пра флору і фауну мясцовых лясоў.