Баранавічы. Касцёл Узвышэння Святога Крыжа.

Сам горад Баранавічы адносна малады. Ён пачаў хутка развівацца напрыканцы 19 стагоддзя, калі тут прайшла чыгунка. Таму большасць помнікаў архітэктуры пабудаваны ў пачатку 20 стагоддзя. За польскім часам у цэнтры горада была ўзведзена праваслаўная Пакроўская царква, якая ўпрыгожана ўнікальнымі мазаікамі. Мазаікі перанеслі з праваслаўнага храма ў Варшаве. І недалёка ад царквы, на той жа вуліцы Куйбышава, знаходзіца невялікі, але вельмі прыгожы драўляны касцёл Узвышэння Святога Крыжа. Касцёл лічыцца старэйшым каталіцкім храмам у Баранавічах. У 1911 годзе ў горадзе была арганізавана каталіцкая парафія. Ксёнз Люцыян Жаландкоўскі стварыў камітэт для пабудовы касцёла ў 1923 годзе і храм быў пабудаваны ў 1924 годзе.

Касцёл Узвышэння Святога Крыжа помнік архітэктуры эклектыкі і тут ёсць нешта ад готыкі і нешта ад барока. Трохнефная базіліка пераходзіць у пяцігранную апсіду. Дынамічнасць храму надае вышынны перапад нефаў. На галоўным фасадзе шматфігурная вежа на 8 – гранным барабане. У інтэр'еры ёсць алтар з 4 – ма калонамі і абразамі, якія напісаны ў пачатку 20 стагоддзя. Перад касцёлам пабудавана мураваная брама.