Жалезніца. Капліца–пахавальня Вольскіх.

У Баранавіцкім раёне знаходзіцца мястэчка Жалезніца, дзе на мясцовых могілках захавалася мураваная капліца–пахавальня роду Вольскіх.

Мястэчка вядомае з 15 стагоддзя з часоў Вялікіга Княства Літоўскага. Спачатку належыла Кезгайлам, а потым магнацкаму роду Хадкевічаў. Потым у 17 стагоддзі тут былі гаспадарамі Камароўскія і Кашыцы.

Пасля другога падзелу Рэчы Паспалітай мястэчка ў складзе Расійскай імперыі і ўваходзіла ў склад Навагрудскага ўезда Мінскай губерніі.

У 1838 годзе была пабудавана драўляная Пакроўская царква ў стылі драўлянага народнага дойлідства і была пакрыта гонтам. Храм згарэў у часы Вялікай Айчыннай вайны. У 2006 годзе на месцы знішчанай царквы была ўзведзена новая мураваная капліца.

Капліца–пахавальня роду Вольскіх знаходзіцца на ўсходзе мястэчка на старых каталіцкіх могілках. Будынак узведзены ў першай палове 19 стагоддзя. Храм створаны ў стылі класіцызму. Мае ў плане прамавугольнік. Накрыты двухсхільным дахам. Фасад аздоблены чатырохкалонным порцікам дарычнага ордэра, які завершаны трохвугольным франтонам.

У інтэр'еры маецца алтар з шасцю пілястрамі і ляпнымі дэкаратыўнымі гірляндамі. Над алтаром размешчаны трохвугольны франтон. У храме маецца крыпта з пахаваннямі. Храм знаходзіцца ў аварыйным стане. Крыпта разрабаваная.