Новая Мыш. Каталіцкія могілкі.

Побач з горадам Баранавічы ўсяго ў адным кіламетры ад трасы М–1 знаходзіцца старажытнае мястэчка Новая Мыш на рацэ Мышанка. У мястэчку да нашага часу захавалася шмат гістарычных помнікаў і артэфактаў.

На былой гандлёвай плошчы ў гістарычным цэнтры ёсць касцёл 17–19-га стагоддзя, праваслаўная царква 19 стагоддзя, за касцёлам помнік паэту Яну Чачоту, недалёка ад плошчы старая мураваная карчма, сінагога, брацкая магіла савецкіх воінаў і партызан і многае іншае.

У мястэчку таксама захаваліся старажытныя каталіцкія могілкі. На могілках ёсць драўляная капліца адназрубная, прамавугольная ў плане. Ёсць шэраг пахаванняў 19 – пачатка 20-га стагоддзя. Захаваліся мураваныя пастаменты і капліцы, надгробныя помнікі з граніту і металічныя выявы і распяцці. Як даехаць да могілак: пры ўездзе ў мястэчка па вуліцы Баранавіцкай, а потым па Садовай, або Слонімскай, амаль у канец мястэчка.

Упершыню Мыш упамінаецца ў 15 стагоддзі ў часы Вялікага Княства Літоўскага і ўваходзіла ў склад Навагрудскага павета. У 16 стагоддзі ўласнасць магната Яна Караля Хадкевіча, які родам з гэтых мясцінаў. У суседнім мястэчку Старая Мыш захавалася Замкавая гара на месцы замка, дзе калісці нарадзіўся выбітны палкаводзец.

Мястэчка неаднойчы знішчалася войнамі і пажарамі, але паўставала і адбудоўвалася. І да нашага часу тут захавалася багата помнікаў даўніны.