Дамашэвічы. Сядзіба рода Леяў.

Побач з горадам Баранавічы знаходзіцца мястэчка Дамашэвічы. Мястэчка вядома з гістарычных крыніцаў з 15 стагоддзя і належыла розным гаспадарам. Спачатку Песляковічу, потым Рагозічу і Бранцу. У пачатку 19 стагоддзя належыла роду Корбутаў.

 З сярэдзіны 19 стагоддзя мясцовы маёнтак набыў Іосіф Нейгоф – Лей. У 1876 маёнтак у Дамашэвічах быў уласнасцю яго сына Івана Нейгоф – Лея. З 1888 года гаспадарыла ў сядзібе Надзея Сцяпанаўна Паўлава, а ў 1911 годзе – Аляксандр фон Молер.

 У пачатку 19 стагоддзя ў Дамашэвічах быў палац - аднапавярховы будынак з чатырохсхільным дахам, які быў накрыты гонтам. Было 4 коміна, якія абагравалі будынак. Галоўны ўваход быў аформлены ў выглядзе порціка з двума парамі калон. Сядзіба размяшчалася на азёрнай тэрасе.

Палац да нашага часу не захаваўся і на яго месцы зараз знаходзяцца прыватныя дамы. Захаваўся парк, які па плошчы складае каля пяці гектараў. Спецыялісты налічваюць у парку каля ста відаў раслін. Сярод дрэваў пераважае ліпа. Ёсць таксама бяроза, рабіна, белая акацыя і іншыя пароды дрэваў. Уздоўж сцежак растуць дэкаратыўныя кустарнікі.