Алешавічы. Сядзіба Незабытоўскіх

У Мастоўскім раёне ў мястэчку Алешавічы засталіся парэшткі сядзібы Незабытоўскіх. У 18 стагоддзі ў часы Вялікага Княства Літоўскага мястэчка належыла Барановічам, якія пабудавалі тут сядзібу.

Потым сядзібу набыў Ян Незабытоўскі. Натупным гаспадаром быў яго сын Крыштаф, а потым унук Канстанцін. У сярэдзіне 19 стагоддзя К. Незабытоўскі зрабіў перабудову сядзібы па праекту архітэктара Адама Ідзкоўскага. Старэйшы сын Канстанціна Караль Станіслаў Незабытоўскі (1865 - 1952) стаў уладальнікам маёнтка. У 1920 годзе мястэчка перайшло да дачкі Караля Ірыне, якая была тут гаспадыняй да прыхода савецкай улады ў 1939 годзе.

 Палац, які пабудавалі Барановічы ў 18 стагоддзі, магчыма, што існаваў ужо ў 17 стагоддзі. У сярэдзіне 19 стагоддзя будынак перабудавалі і мы яго бачым на акварэлі Напалеона Орды. Гэта быў мураваны двухпавярховы будынак з цэнтральным рызалітам і тэрасай, якая абапіраецца на каланаду.

У інтэр'еры меўся вялікі вестыбюль з аднамаршавай лесвіцай. Былі таксама бібліятэка, «ружовы» і «блакітны» салоны. Над бальнай залай капліца і іншыя памяшканні. Падлога парадных пакояў мела ўзорысты паркет з дуба. Сцены палаца былі аздоблены шпалерамі. Атаплівалася памяшканне грубкамі 19 стагоддзя, якія былі аздоблены белым кафлем. Былі таксама мармуровыя каміны з барэльефамі. Вялікая калекцыя жывапісу мела больш за сто карцін – пераважна італьянскіх майстроў.

 Вакол палаца быў парк і гаспадарчыя пабудовы. Парк меў плошчу больш 10 гектараў. Парк заснаваны яшчэ ў 18 стагоддзі. Да нашага часу захавалася частка парку і некалькі гаспадарчых пабудоў у неагатычным стылі. Будынкі ўзведзены з цэглы і бутавага камяня.