Мікелеўшчына. Касцёл Найсвяцейшай Дзевы Марыі

У мястэчку Мікелеўшчына, якое знаходзіцца на дарозе паміж Мастамі і Шчучыным, пабудаваны мураваны касцёл Найсвяцейшай Дзевы Марыі. Каталіцкі касцёл узведзены на ўскраіне мястэчка на мясцовых могілках у 1823 годзе ў часы Расійскай імперыі. Касцёл мураваны, пабудаваны з цэглы і бутавага камяня. Святыня была створана за сродкі Багумілы Бутаўт – Андрэйковіча. Касцёл існаваў, як філіял пры парафіі ў Мастах. Храм асвяцілі ў верасні 1826 года. У 1878 годзе адбылася рэканструкцыя будынка – да галоўнага аб'ёму прыбудавалі нартэкс і вежу.

 У 1911 годзе касцёл у Мікелеўшчыне атрымаў статус самастойнай парафіі. У гэты перыяд касцёл налічваў 1300 вернікаў у сваёй парафіі. Пасля Вялікай Айчыннай вайны у касцёла забралі будынак плябаніі, а самому храму надалі статус помніка архітэктуры. Каталіцкая святыня ў савецкія часы не зачынялася.

 Помнік у плане мае чатырохвугольнік і накрыты двухсхільным дахам. У інтэр'еры маюцца фрэскавыя роспісы: выявы евангелістаў, архітэктурны карніз з анёламі. У касцёле ёсць тры двухярусныя алтары, якія ў выглядзе ілюзорнага жывапісу намаляваныя на алтарнай сцяне.

Галоўны алтар мае абраз: першы ярус – Яна Храсціцеля і Езуса, а на версе – выява Бога Творцы. Левы бакавы алтар мае абраз Святога Юды Тадэвуша і скульптуру Маці Божай Фацімскай, а наверсе – Маці Божая Чанстахоўская. Правы алтар – абраз Святога Антонія і скульптура Найсвяцейшага Сэрца Пана Езуса, а наверсе – Маці Божая Вастрабрамская.