Дворышча. Вадзяны млын і сядзіба.

У Лідскім раёне ёсць мястэчка Дворышча. Першымі гаспадарамі на гэтай зямлі былі Ільінічы, затым Радзівілы і віленскі епіскап Валерыян Пратасевіч. Епіскап незадоўга да свайго скону перадаў маёнтак езуіцкаму калегіўму ў Вільні. І ў 17 стагоддзі каталіцкі ордэн езуітаў стварае ў мястэчку фальварак, які прыносіў добры прыбытак. Пасля забароны ордэна езуітаў маёмасць некалькі разоў мяняла сваіх гаспадароў. У 19 стагоддзі вялікую рэканструкцыю маёнтка правялі Пуслоўскія, якія пабудавалі тут 2 завода: крахмальны і півавараны. Была пабудавана і новая сядзіба. Палац пабудавалі драўляны з каменным падмуркам. Палац складаўся з трох частак. Будынак, які быў па сярэдзіне – быў 4 – х павярховы, а два крайніх – двухпавярховыя. У палацы было 30 пакояў, а ацяпленне было пячное. Сядзіба моцна пацярпела ў часы Першай сусветнай вайны і ад яе засталася толькі высокая 4 – х павярховая вежа. У вежы было 4 пакоі. На верхнім паверсе была аглядная пляцоўка. На тэрыторыі сядзібы таксама захаваўся вадзяны мураваны млын, які некалькі год таму выкупіў беларускі бізнэсмен. Млын ужо адрэстаўравалі. Там адкрыты рэстаран і музей. Сюды можна прыехаць на адпачынак і пачаставацца незвычайнымі стравамі. Прадаюцца таксама сувеніры. Паміж вежай і млыном захаваўся парк і некалькі гаспадарчых будынкаў.