Высокае. Касцёл Святой Троіцы

Мястэчка Высокае, якое знаходзіцца паміж Брэстам і Беластокам у Камянецкім раёне вядома з 14 стагоддзя. Вялікі князь Літоўскі Вітаўт стаў першым фундатарам касцёла ў Высокім у 15 стагоддзі.

 У 1603 годзе Андрэй Вольскі, а па некаторым краніцам Андрэй Война, залажыў мураваны касцёл на месцы драўлянай капліцы Святой Барбары. Капліца згарэла ў час вайны са шведамі. Новы касцёл у 1609 годзе асвяціў біскуп Павел Валуцкі. Параметры храма былі наступныя: у шырыню 12 аршын, а ў даўжыню 44. У 1735 годзе касцёл быў адрамантаваны і адноўлены пры Сапегах. У касцёле было некалькі званоў і большы з іх меў назву ў гонар Святых Пятра і Паўла. У 1872 годзе па фундацыі Марыі Патоцкай касцёл зноў рамантуецца. У храме былі пахаваны некаторыя прадстаўнікі роду Сапег.

 У часы Польскай дзяржавы ў 1935 годзе прыход пры касцёле налічваў больш двух тысяч чалавек. У час Вялікай Айчыннай вайны помнік быў пашкоджаны.

 У гады Савецкага Саюза касцёл зачынілі і ён быў перабудаваны пад спартовы зал. З развалам СССР вернуты каталіцкім вернікам. Была праведзена рэстаўрацыя. Касцёл мураваны, пабудаваны ў стылі барока з элементамі класіцызму. Фасад двухвежавы, першапачаткова вежы - званіцы былі трохярусныя з багатым ляпным баракальным аздабленнем. Інтэр'ер мае тры нефы. У плане касцёл пабудаваны ў форме лацінскага крыжа. Вакол храма мураваная агароджа.