Высокае. Царква Крыжаўзвіжанская

У цэнтры мястэчка Высокае знаходзіцца мураваная Крыжаўзвіжанская праваслаўная царква. Царква пабудавана ў 1869 годзе на месцы старога храма. Царква ўзведзена па праекту акадэміка архітэктуры Мікалая Чагіна (1823 – 1909) і зацверджана графам Міхаілам Мураў'ёвым.

 Архітэктар М. Чагін кіраваў пабудовай праваслаўных храмаў у заходніх губерніях Райскай імперыі, дзе пачалося актыўнае ўзвядзенне цэркваў пасля падаўлення анцірасійскага паўстання 1863 – 1864 гадоў. Працаваў грамадзянскім інжынерам пры Гродзенскай палаце дзяржаўных маёмасцяў. Потым прызначаны архітэктарам па пабудове праваслаўных храмаў у Магілёўскай і Віцебскай губернях. З 1864 года займаў пасаду віленскага губернскага архітэктара.

 Праваслаўная царква ў Высокім была пабудавана за грошы, якія канфіскоўвалі ў удзельнікаў анцірасійскага паўстання. Храм пабудаваны ў псеўда – рускім стылі. Будынак складаецца з чатырох асноўных частак: прытвор, трапезная, малітоўная зала і апсіда. Над прытворам надбудавана двухярусная вежа – званіца, завершаная высокім гранёным шатром з цыбулінай. Трапезная накрыта двухсхільным дахам. Малітоўная зала аформлена кубападобным цэнтрычным аб'ёмам, які накрыты чатырохсхільным дахам і ўвенчаны 5 купаламі на 8 – граных барабанах.

 У інтэр'еры ёсць двухярусны іканастас 19 стагоддзя. На сцяне ўсталявана памятная шыльда аб візіце ў царкву ў 1886 годзе імператара Аляксандра ІІІ разам з сям'ёй. Маюцца старажытныя абразы 17 – 19 стагоддзяў. Вакол царквы ўзведзена мураваная агароджа з бутавага камяня. Царква адрамантавана.