Войская. Царква Святой Троіцы

Паміж гарадком Высокім і раёным цэнтрам Камянец ёсць мястэчка Войскае. У гэтым мястэчку на ўскрайку паселішча пабудавана драўляная праваслаўная царква Святой Троіцы. Храм узведзены ў часы Вялікага Княства Літоўскага недзе ў 1773 годзе. Фундатарамі былі прадстаўнікі роду Бухавецкіх, сродкі збіралі і прыхаджане. Святаром у той час быў Лука Куніцкі. У той перыяд царква належыла ўніяцкім вернікам. У 19 стагоддзі пасля забароны ўніяцтва на тэрыторыі Расійскай імперыі царкву перадалі праваслаўным.

 Напрыканцы 19 стагоддзя прыход налічваў каля 2 тысяч чалавек з 7 бліжэйшых вёсак.  Царква пабудавана ў традыцыях беларускага народнага дойлідства з рысамі барока. Храм у плане ўяўляе з сябе прамавугольны выцягнуты зруб да якога прыбудавана трохгранная апсіда. Будынак накрыты двухсхільным дахам, які быў раней пакрыты гонтам. Яшчэ некалькі год таму на даху размяшчалася барочная ярусная вежа, якую нядаўна  замянілі на цыбуліну. Да галоўнага фасада прыбудаваны прамавугольны прытвор. У інтэр'еры захаваўся іканастас 19 стагоддзя. У 19 стагоддзі перад царквой пабудавана мураваная двухярусная брама – званіца. Вакол царквы ўзведзены з бутавага камяня забор. Некалькі год таму ў царкве праведзены рамонт.