Смаляніца. Царква Святога Мікалая.

У мястэчку Смаляніца Пружанскага раёна ёсць мураваная праваслаўная царква Святога Мікалая. Маленькую драўляную царкву тут пабудавалі мясцовыя сяляне ў 1821 годзе. Прыхаджане набылі за свае сродкі ўсе царкоўныя прылады.

Новы мураваны храм у Смаляніцы залажылі летам 1867 года. Будаўніцтва вялося за дзяржаўны бюджэт і было выдаткавана 5.559 рублёў сродкаў. Сяляне і прыхаджане дапамагалі пры будаўніцтве чым маглі: прывозілі пясок і ваду, будаўнічы камень і цэглу. Прыхаджане за свае сродкі набылі царкоўныя прылады і ў тым ліку крыжы, харугві і вопратку для святароў.

Землямер Валерыян Дывнагорскі ахвяраваў звон за 200 сярэбраных рублёў, які важыў 10 пудоў. 

Асвяцілі царкву зімой 1872 года. А старую драўляную царкву перанеслі на могілкі .

Пасля Вялікай Айчыннай вайны ў савецкія часы храм зачынілі. Будынак прыйшоў у занядбаны стан і пачаў руйнавацца. Пасля развала СССР храм вярнулі праваслаўным вернікам і была распачата рэстаўрацыя помніка.

Будынак узведзены ў псеўда–рускім стылі і складецца з чатырох асноўных частак: прытвор, трапезная, малітоўная зала і апсіда. Будынак адрамантаваны ў апошнія гады. Прылеглая тэрыторыя добраўпарадкавана.