Руднікі. Пакроўская царква

У мястэчку Руднікі Пружанскага раёна ёсць мураваная праваслаўная царква 19 стагоддзя. Рашэнне аб будаўніцтве новага храма было прынята ў 1866 годзе і будаўніцтва пачалося на месцы старажытнай драўлянай царквы. Старую царкву перанеслі на мясцовыя могілкі, дзе і адбываліся набажэнствы пакуль будаваўся новы храм.

 Пры гэтым была вырашана няпростая інжынерная і транспартная праблема, бо драўляную царкву было вырашана перанесці не часткамі, а цэлым будынкам і за вырашэнне такой задачы ўзяўся мясцовы селянін Іван Барысевіч з вёскі Харэва. Царква па памерам складала 9,5 сажняў у даўжынюі 4,5 у шырыню, 8 сажняў у вышыню. На перанос храма было патрачана 221 рубель срэбрам. Асвяціў могілкавую царкву святар Канстанцін Макавельскі.

І пачалося будаўніцтва новай мураванай царквы. На Пакроўскую царкву з дзяржаўнай казны было выдаткавана 17.711 рублёў і 55 капеек. Падсобную працу выконвалі сяляне Руднікоўскай воласці, дзе налічвалася 340 двароў. Працы праводзіліся сялянамі без аплаты. Асвяцілі новую царкву Пакрава Прасвятой Багародзіцы ў снежні 1872 года. Святочную службу па асвячэнні храма праводзіў святар з Пружанаў Мікалай Жуковіч. У асвячэнні таксама прымалі ўдзел 5 святароў, а «богомольцев» было больш за тысячу чалавек. За ўсю сваю гісторыю Пакроўская царква ніколі не зачынялася.