Лыскава. Касцёл Святой Троіцы і манастыр місіянераў

У старажытным мястэчку Лыскава Пружанскага раёна ёсць некалькі цікавых помнікаў архітэктуры і гісторыі. Самым значным помнікам архітэктуры з'яўляецца каталіцкі касцёл Святой Троіцы і манастыр місіянераў.

У часы Вялікага Княства Літоўскага ў 1527 годзе стараста жамойцкі і ваявода віцебскі Мацей Клочка фундаваў у Лыскаве драўляны касцёл. У 1751 годзе гэты каталіцкі касцёл Ян Быхавец перадаў манахам–місіянерам. Манахі ў 1763 – 1785 гадах пабудавалі новы мураваны архітэктурны комплекс: касцёл і манастыр. Па меркаванню даследчыкаў будаўніцтва вялося архітэктарам Янам Самуэлем Бекерам, які быў прыдворным архітэктарам магната Аляксандра Сапегі.

Пасля трэцяга падзелу Рэчы Паспалітай мястэчка апынулася ў складзе Расійскай імперыі. Касцёл і манастыр працавалі, як каталіцкія святыні, а ў 1818 годзе да касцёла была прыбудавана вежа.  Пасля анцірасійскага паўстання 1830 – 1831 гадоў уладамі быў зачынены манастыр. А пасля паўстання 1863 – 1864 гадоў пад кіраўніцтвам К. Каліноўскага зачынілі і касцёл. Будынак касцёла быў перабудаваны пад праваслаўную царкву па праекту архітэктара П. Залатарова ў 1880 – х гадах. Пасля перабудовы баракальны касцёл набыў рысы класіцызму.

За часамі Польскай дзяржавы ў 1921 годзе будынак вярнулі каталіцкім вернікам. Пасля вайны ў савецкія часыу манастыры адчынілі медыцынскую ўстанову, а касцёл зачынілі ў 1960 – я гады. Паступова помнік прыхозіў у заняпад і зараз касцёл знаходзіцца ў аварыйным стане.

Каля касцёла знаходзіцца магіла паэта Францыска Карпінскага (1741 - 1825), якую намаляваў Напалеон Орда ў 19 стагоддзі.