Лыскава. Царква Нараджэння Маці Божай.

У самым цэнтры мястэчка Лыскава Пружанскага раёна знаходзіцца праваслаўная драўляная царква, якую асвяцілі ў гонар Нараджэння Маці Божай.

 Першая царква ў Лыскава ўпамінаецца ў часы Вялікага Княства Літоўскага, якую пабудавалі ў 1725 годзе. Храм, худчэй за ўсё, спачатку належыў уніяцкім вернікам, а потым у часы Расійскай імперыі быў перададзены праваслаўным вернікам. Напрыканцы 19 стагоддзя царкву разабралі, а царкоўныя рэчы перанеслі ў былы касцёл, які пасля паўстання 1863 – 1864 гадоў перабудавалі пад праваслаўную царкву.

 У гады Першай сусветнай вайны нямецкія войскі выкарыстоўвалі царкву пад шпіталь, а потым пад склад.

 Пасля Рыжскага міру 1921 года будынак вярнулі зноў каталікам і выкарыстоўвалася святыня, як касцёл.

 У 1925 годзе праваслаўны святар у Лыскава Пётар Радкевіч атрымаў дазвол на будаўніцтва новага праваслаўнага храма, бо дагэтуль набажэнствы ішлі ў капліцы на могілках. Будаўніцтва новага храма каштавала 40 тысяч злотых і вялося па праекту Станіслава Пятроўскага з Беластоку ў 1930 – 1933 гадах. Увосень 1933 года адбылося асвячэнне новай праваслаўнай царквы ва ўрачыстай абстаноўцы ў прысутнасці шматлікага народу і гасцей.

 Царква ўзведзена ў традыцыях беларусккай народнай драўлянай архітэктуры з элементамі закапанскага стылю і мадэрну.