Мокрае. Царква апосталаў Пятра і Паўла

У мястэчку Мокрае Пружанскага раёна ёсць мураваная праваслаўная царква ў гонар апосталаў Пятра і Паўла. Храм пабудаваны ў 19 стагоддзі ў часы Расійскай імперыі. У тыя часы гэта мясцовасць была часткай Гродзенскай губерніі Пружанскага ўезда. А ў часы Польскай дзяржавы 1921 – 1939 гадоў – Палескае ваяводства Пружанскага павета.

Царква Пятра і Паўла была пабудавана па загаду графа М. Мураў'ёва за дзяржаўныя грошы. З казны было выдаткавана больш шасці тысяч рублёў, а самой пабудовай храма кіравала мясцовае прыхадское папячыцельства.

Збіраліся ахвяраванні з прыхаджан на сродкі якіх зроблена рызніца, бакавыя дзверы, набытыя царкоўныя рэчы і іншае. Мясцовы святар Смольскі ахвяраваў 100 рублёў, селянін Якаў Зелянько – 10 рублёў, Мелання Пляскова – 23 рублі.

Храм узведзены ў рэтраспектыўна – рускім стылі. Асвяцілі царкву летам 1873 года пры ўрачыстай абстаноўцы. Пружанскі святар Мікалай Жуковіч і яшчэ чатыры святары пры вялікай колькасці народа асвяцілі святыню.

Пасля Вялікай Айчыннай вайны царкву зачынілі і будынак прыйшоў у заняпад.

Сродкаў на аднаўленне храма пасля развала СССР не маглі знайсці. І з гэтай праблемай дапамог зямляк – старшыня Нацыянальнага банка Рэспублікі Беларусь Пётр Пракаповіч, які дапамог знайсці сродкі на аднаўленне помніка. У 2000–м годзе царкву пасля рэстаўрацыі зноў асвяцілі.