Шарашова. Царква Раства Багародзіцы. Званіца

У цэнтры мястэчка Шарашова Пружанскага раёна знаходзіца ўнікальны помнік архітэктуры – драўляная званіца былоў уніяцкай царквы. Калісці побач са званіцай была драўляная царква, якую пабудавалі яшчэ ў часы Вялікага Княства Літоўскага  ў 1517 годзе. Потым храм у 1760 годзе перабудавалі.

У 1803 годзе ў час пажару была знішчана старая плябанія і дзякуючы высілкам ксянза Антонія Прыбышэвіча і князя Адама Чартарыйскага будынак быў адноўлены. У пачатку 19 стагоддзя да царквы было прыпісана тры капліцы.

У гэты час пры царкве служыў вядомы беларускі навуковец і грамадскі дзеяч, выкладчык Віленскага ўніверсітэта Міхась Баброўскі, які вёў набажэнствы на беларускай мове. У царкве ў тыя часы выкарыстоўвалася для службы рукапіснае Евангелле 15 – 16 стагоддзяў. Гэтая каштоўная кніга зараз разам з абразамі старажытнымі і іканастасам 18 стагоддзя знаходзіцца ў Мінску ў Нацыянальным мастацкім музеі.

 Пасля забароны ўніі  ў Расійскай імперыі ў 1839 годзе царкву перадалі праваслаўным вернікам і царкву асвяцілі ў гонар Успення Багародзіцы. Пасля Вялікай Айчыннай вайны ў 1960 – я гады царкву знеслі. Ад царквы засталася толькі драўляная званіца, якую пабудавалі ў 1799 годзе ў стылі класіцызму. Званіца двухярусная квадратная ў плане. Мае вышыню 18 метраў.  Дах пакрыты дранкай.