Падароск. Сядзіба Чачотаў-Бохвіцаў.

У мястэчку Падароск на беразе возера ёсць шляхецкая сядзіба 18–га стагоддзя, якая лічыцца помнікам гісторыка-культурнай спадчыны рэспубліканскага значэння.

Першымі гаспадарамі ў Падароску былі паны шматкі, потым Грабоўскія. Менавіта Грабоўскія і пабудавалі першую каменную сядзібу. У 1843 годзе маёнтак перайшоў да Пухальскага. Затым Лізавета Пухальская перадала маёнтак свайму пляменніку Альбіну Чачоту, а Альбін перадаў дачцэ Лізавеце. У 1875 годзе Лізавета выйшла замуж за Рамана Бохвіца, які быў сынам вядомага вучонага і філосафа Фларыяна Бохвіца. Да 1939 года тут гаспадарыў Антон Бохвіц, які быў сынам Рамана і Лізаветы.

У савецкія гады ў палацы была спачатку школа, а пазней праўленне калгаса і музычная школа. У 2013 годзе маёнтак набыў прадпрымальнік, які пачаў рэстаўрацыю і хоча адкрыць тут музей шляхецкай культуры.

Ад мястэчка Падароск маёнтак аддзяляе рачулка Зэльвянка. Палац сядзібы пабудаваны ў 18 стагоддзі Грабоўскімі ў стылі класіцызму. У ранейшыя часы, як сцвярджалі старажылы, на палацы быў усталяваны металічны сцяг з датай 1768.

Будынак аднапавярховы прамавугольны ў плане. Мае сіметрычную кампазіцыю з двухпавярховай цэнтральнай часткай, якая вылучана на галоўным фасадзе порцікам з трохвугольным франтонам. Бакавыя крылы палаца атынкаваны і накрыты вальмавым дахам.

У палацы пры галоўным уваходзе размяшчаўся вестыбюль з лесвіцай на мезанін. На першым паверсе было 10 вялікіх пакояў. У гасцінай пакоі камін быў аздоблены скульптурай караля Яна Сабескага. У пакоях былі партрэты прадстаўнікоў роду Чачотаў і Бохвіцаў. Сталовая часам выкарыстоўвалася як капліца. Салон у палацы быў абстаўлены дарагі мэбляй ў стылі ампір.

З гаспадарчых пабудоў захавалася аранжарэя і будынкі сыраварні і кузні. Вакол палаца размяшчаецца парк.