Зельзін. Царква Узвышэння Святога Крыжа.

У мястэчку Зельзін Пружанскага раёна на мясцовых могілках ёсць мураваная праваслаўная царква Узвіжэння Святога Крыжа. Прасцей за ўсё да вёсцы Зельзін даехаць ад мястэчка Ружаны.

Першая царква ў Зельзіне ўпамінаецца ў дакументах у эпоху Вялікага Княства Літоўскага ў 1420 – 1430 – я гады. Паводле мясцовага падання храм пабудавала за свае сродкі княгіня, якая ледзь не патанула ў балоце і яе выратавалі паляўнічыя.

 У часы Расійскай імперыі Зельзін быў у складзе Гродзенскай губерніі Ваўкавыскага павета. У 19 стагоддзі тут меўся маёнтак роду Быхаўцаў, праваслаўная царква, якая адносілася да храма ў Падароску.

Царква Крыжаўзвіжанская была пабудавана ў 1878 годзе. Помнік узведзены ў стылі эклектыкі на зямлі прыхадскіх могілак. З старога храма сюды перанеслі абраз Божай Маці, які дужа шанаваўся мясцовымі жыхарамі і драўляны крыж, выкананы з дуба.

 У 1900 годзе была пабудавана мураваная капліца каля царквы, якую асвяцілі ў гонар Святых віленскіх мучанікаў Антонія, Іаана і Яўстафія. Капліца ўзведзена за сродкі святара Антонія Радкевіча.

У савецкія часы пасля Вялікай Айчыннай вайны ў 1962 годзе царкву зачынілі і памяшканне прыстасавалі пад вясковы клуб. А ўсе царкоўныя рэчы былі перададзены ў іншую царкву, а частку ў касцёл у Ружанах. Затым будынак быў моцна пашкоджаны пажарам і стаяў у руінах да развала СССР. У 1990- я гады храм быў адноўлены і ў ім пачаліся набажэнствы.