Пярковічы. Царква Успення Прасвятой Багародзіцы

У Драгічынскім раёне ў мястэчку Пярковічы ёсць праваслаўная царква Успення Прасвятой Багародзіцы. Храм размяшчаецца на ўскраіне мястэчка пры сядзібна – паркавым ансамблі роду Віславухаў.

Першы храм быў узведзены ў часы Вялікага Княства Літоўскага ў 16 стагоддзі за сродкі гаспадара мястэчка ўніяцкага епіскапа луцкага і астрожскага Кірылы Цярлецкага. Храм быў драўляны на мураваным падмурку і асвечаны, як Успенская царква. Храм меў дзве вежы і купал. У інтэр'еры было тры алтары, якія выкананы ў тэхніцы мастацкай рэзі і царскія брамы. Менавіта ў гэтай царкве і быў пахаваны ў 1607 годзе Кірыла Цярлецкі. Таксама ў храме размясцілі надмагільную гранітную пліту з надпісам. У 17 стагоддзі драўляны храм быў знішчаны ў час шматлікіх войнаў.

Новы храм фундаваў падкаморы брэсцкі Зянон Віславух каля 1770 года. Царква належыла ўніяцкім вернікам. Храм быў дабудаваны ў 1805 годзе Віктарам Віславухам, сынам Зянона. У будынку была створана крыпта, дзе хавалі прадстаўнікоў роду Віславухаў і пахавалі Кірылу Цярлецкага. У 19 стагоддзі ў часы Расійскай імперыі ўнія была забаронена і храм перадалі праваслаўным вернікам.

У савецкія часы крыпту разрабавалі і замуравалі. Пасля вайны царкву зачынілі. Перадалі святыню вернікам у 1990 годзе. Помнік пабудаваны ў стылі класіцызму. Храм аднанефны.

Напрыканцы 19 стагоддзя надмагілле Цярлецкага было добра даследавана. Зараз надмагільная пліта знаходзіцца ў Мінску ў Музеі старажытнабеларускай культуры.