Брашэвічы. Царква Праабражэння Гасподняга

Паміж Драгічыным і Кобрынам на трасе М10 ёсць мястэчка Брашэвічы.

Мястэчка Брашэвічы Драгічынскага раёна ўпершыню ўпамінаецца ў 15 стагоддзі. У часы Вялікага Княства Літоўскага першымі гаспадарамі тут былі прадстаўнікі роду Кезгайлаў, якія фундавалі драўляны каталіцкі касцёл. З 1554 года сядзібу набыў епіскап луцкі Валерыян Пратасевіч. У1636 годзе новым гаспадаром быў Ян Нарушэвіч. Наступны, хто валодаў Брашэвічамі – гэта канцлер Вялікага Княства Літоўскага Альбрэхт Станіслаў Радзівіл.

Напрыканцы 17 стагоддзя ў мястэчку была пабудавана драўляная ўніяцкая царква. Гэты старажытны храм у 1863 годзе намаляваў вядомы мастак і кампазітар Напалеон Орда.

 У 1911 – 1914–х гадах была пабудавана новая мураваная праваслаўная царква. Храм узведзены па тыпавому праекту. Будынак складаецца з чатырх асноўных частак: прытвор, трапезная, малітоўная зала і апсіда. Над прытворам надбудавана шматярусная вежа – званіца. Над асноўным аб'ёмам васьмігранны барабан з купалам – цыбулінай. Храм упрыгожаны дэкорам з выкарыстаннем элементаў старажытнарускага дойлідства. У інтэр'еры маецца іканастас 19 стагоддзя.