Сноў. Царква Космы і Дэміяна.

    У мястэчку Сноў Нясвіжскага раёна ёсць сядзіба пад назвай Горны Сноў. Там захавалася каменная сядзіба Гартынгаў і праваслаўная царква Космы і Дэміяна.

        Упершыню сноў згадваецца ў дакументах у эпоху Вялікага Княства Літоўскага ў 15 стагоддзі. У 1769 годзе Ян Хрыстафор Рдултоўскі, які меў свой вялікі палац у Снове, заснаваў на мясцовых могілках на ўскраіне мястэчка капліцу. Гэта быў невялікі драўляны храм, які асвяцілі ў гонар Святых Пятра і Паўла.

       У часы Расійскай імперыі ў 1830 годзе храм быў знішчаны пажарам. Тады па фундацыі Казіміра Рдултоўскага была пабудавана мураваная царква ў 1836 годзе. Царкву таксама асвяцілі ў гонар Пятра і Паўла. У канцы стагоддзя ў 1893 годзе царкву перабудавалі і асвяцілі ў гонар Космы і Дэміяна. Пры храме працавала царкоўна-прыходская школа, дзе выкладалі пісьмо, чытанне, арыфметыку і Закон Божы.

         Царква працавала і падчас Вялікай Айчыннай вайны і ў савецкія часы. У гэты храм перадаваліся іконы і царкоўныя рэчы з іншых храмаў, якія зачыняліся.

      Царква помнік архітэктуры класіцызму. У плане будынак мае прамавугольны аб'ём. Да якога прыбудавана трохгранная апсіда. Над фасадам надбудавана чацверыковая вежа-званіца. У інтэр'еры над уваходам хоры.

        Ёсць у храме трох'ярусны іканастас 18-га стагоддзя, які зрабілі ў Вільні ў праваслаўным манастыры Святога Духа. У іканастасе разьбяная царская брама скразной рэзі з абразамі чатырох евангелістаў.