Новадзявяткавічы. Сядзіба Слізняў

У мястэчку Новадзевяткавічы Слонімскага раёна знаходзіцца некалькі помнікаў архітэктуры і даўніны. Упершыню ў гістарычных крыніцах мястэчка згадваецца ў 16 стагоддзі ў часы Вялікага Княства Літоўскага. У тыя часы сядзіба належала Мялешкам.

Род Мялешкаў герба "Карчак" у Слонімскім павеце меў вялікія ўладанні. У 1677 годзе Тэадор Мялешка прадаў маёнтак Дзевяткавічы Аляксандру Казіміру Слізню. Гэты род тут і гаспадарыў да прыходу савецкай улады ў 1939 годзе.

Тадэвуш Слізень пабудаваў у Старых Дзевяткавічах драўляны Каталіцкі Касцёл у 1779 годзе, а потым у Новых Дзевяткавічах пабудаваў каменны касцёл, які асвяцілі ў гонар Пятра і Паўла. Касцёл мураваны ўзвялі ў стылі барока, ён прызначаўся як храм-пахавальня для роду Слізняў.

У пачатку 19-га стагоддзя СлізнI валодалі ўжо некалькімі маёнткамі ў Слонімскім павеце. У 19 стагоддзі Альфрэд Слізень будуе ў Новадзявяткавічах грандыёзны палац-замак у англійскім стылі.

Палац не захаваўся да нашага часу. У гэты перыяд сядзібу наведаў вядомы мастак і кампазітар Напалеон Орда, які пакінуў нам акварэль, дзе палац намаляваны з боку.

Гэта быў трохпавярховы каменны грандыёзны будынак, які накрыты двухсхільным дахам. Архітэктурнай дамінантай з'яўлялася вежа ў плане чатырохвугольная і па краях гэтай вежы былі невялікія круглыя вежкі. На вежы быў замацаваны флагшток, вымпел на якім казаў пра тое, ці дома цяпер гаспадар сядзібы. У палацы была багатая бібліятэка. Помнік загінуў падчас вайны.

Каля палаца быў парк у рэгуляваным стылі.

Да нашага часу захавалася некалькі гаспадарчых будынкаў ад сядзібы, аднапавярховая частка былога палаца, і парк з сажалкай.