Сурынка. Царква Святога Іллі.

На ўскрайку мястэчка Сурынка Слонімскага раёна пабудавана драўляная праваслаўная царква. Храм асвяцілі ў гонар Святога Іллі.

У часы Расійскай імперыі ў 1854 годзе ў Слонімскім уездзе адбываўся вялікі падзеж жывёлы. Такая ж бяда напаткала і жыхароў мястэчка Сурынка. Каб знайсці выйсце з гэтага становішча мясцовыя сяляне пабудавалі капліцу ў мястэчку.

На месцы капліцы праз некалькі год у 1863 годзе была пабудавана драўляная праваслаўная царква.

Пасля Вялікай Айчыннай вайны ў 1961 годзе храм зачынілі. Напрыканцы існавання Савецкага Саюза царкву зноў перадалі праваслаўным вернікам і з 1988 года ў святыні зноў пачаліся службы. Побач з старажытным храмам у 1995 годзе былі пабудаваныя з цэглы хрысцільня і вежа-званіца. У царкве захаваўся старажытны звон 1702 года.

Помнік узведзены ў стылі беларускага народнага драўлянага дойлідства. Будынак складаецца з трох асноўных архітэктурных частак: прытвор, малітоўная зала і апсіда. Над прытворам узведзены двухярусны крыжовы ў сячэнні барабан, які завершаны купалам–цыбулінай.