Камянец. Касцёл Пятра і Паўла

Першы каталіцкі касцёл у Камянцы быў пабудаваны ў 16 стагоддзі. Пры чым два касцёлы было: Святой Троіцы і Пятра і Паўла. Даследчыкі адзначаюць, што прыкладам для храмаў паслужылі касцёлы ў Кракаве. Касцёл Святых апосталаў Пятра і Паўла фундаваў сам Вялікі Князь Літоўскі Аляксандр. У пачатку 18 стагоддзя храм перабудавалі і яго асвяціў епіскап Луцкі Стэфан Рупнеўскі. Захавалася апісанне касцёла за 1876 год: «Костёл деревянный, фундамент из кирпича, прямоугольной формы с фронтонами, 2 фасадные башни. Костел обит белой жестью с железными крестами в длину 42 аршина в ширину 21 аршин, стены отполированы, крыша покрыта гонтом. В нижнем ярусе было 8 окон, вверхнем 10, всех маленьких окон насчитывалось 11. Железные завесы, внутренние замки в дверях». У інтэр'еры над уваходам былі хоры, якія трымаліся на 2 драўляных калонах. Быў таксама арган на 8 галасоў. Сцены храма былі ўпрыгожаны роспісам. Мелася 8 алтароў.

Але ўся гэта прыгажосць была знішчана пажарам у 1924 годзе, калі ў час навальніцы ў будынак патрапіла маланка. У час пажару ўдалося гараджанам і вернікам вынесці частку архіва, малітоўных кніг і касцёльнага ўбранства. У Белавежскай пушчы быў набыты лес і пабудавана часовая капліца. І пачалося будаўніцтва вялікага мураванага касцёла, у алтарную частку якога ўбудавалі старую вежу – званіцу 18 стагоддзя.

Планавалася, што новы храм будзе большы за папярэдні драўляны. Былі ўзведзены сцены, заставалася дабудаваць толькі дах у будынку. Але наступіў 1939 год і з прыходам савецкай улады частку сцен разабралі і ў памяшканні адчынілі рэстаран з гучнай назвай «Белавежская пушча». Потым тут была звычайная чайная. І толькі пасля развала СССР будынак перадалі каталіцкім вернікам і пачалося будаўніцтва новага касцёла, якое завяршылі ў пачатку 2000- х гадоў.

У Новым касцёле маюцца кнігі 18 – 19 стагоддзяў, якія ўдалося выратаваць вернікам у савецкія часы са старога храма.