Камень. Касцёл Святых апосталаў Пятра і Паўла

Мястэчка Камень Валожынскага раёна знаходзіцца ў 6 кіламетрах ад Івянца. Праз мястэчка пряцякае рачулка Каменка і на ўскраіне знаходзіцца вялікі камень – валун, магчыма ад якога і пайшла назва гэтага паселішча. Першае ўпамінанне адносіцца ў пісьмовых крыніцах да 15 стагоддзя. Спачатку належыла Гедыголдывічам пры якіх быў заснаваны першы каталіцкі прыход, затым Забарэўскім, якія пабудавалі тут касцёл у 16 стагоддзі. У гэты ж час узводзіцца ўмацаваны замак, які праіснаваў да 18 стагоддзя.

 Новыя гаспадары ў 1679 годзе пабудавалі новы каталіцкі касцёл, які двойчы рэстаўравалі ў 19 стагоддзі. Каталіцкая святыня была асвячоная ў гонар апосталаў Пятра і Паўла. Касцёл згарэў у час вайны ў 1944 годзе. Касцёл быў драўляны, пабудаваны ў традыцыях народнага дойлідства з элементамі барока. Храм быў трохнефны з 2 вежамі на фасадзе. Інтэр'ер быў упрыгожаны пяцью алтарамі з гіпсавымі скульптурамі. Перад касцёлам была драўляная двухярусная чатырохгранная вежа – званіца. Касцёльны двор акружала мураваная агароджа з бутавага камяня.

Пасля развала Савецкага Саюза пачалося будаўніцтва новага каталіцкага касцёла на тым жа месцы, дзе быў стары храм. Новы касцёл узведзены ў 1991 годзе з элементамі неаготыкі. Ад старога архітэктурнага ансамбля захавалася толькі мураваная агароджа 19 стагоддзя.