Індура. Касцёл Найсвяцейшай Тройцы.

Касцёл Найсвяцейшай Тройцы быў пабудаваны ў 1825 годзе на сродкі ўладальніка мястэчка Яна Давойны. Яго ўзвялі з цэглы на месцы драўлянага храма, якая была тут закладзена яшчэ ў 1542 годзе, і асвяцілі ў гонар Святой Тройцы.

У перыяд з 1901 па 1904 гады была ажыццёўлена значная рэканструкцыя касцёла: да фасада былі прыбудаваны неабарочная капліца і вежа-званіца, у нішах арачнага тыпу былі ўстаноўлены фігуры святых з дрэва. У інтэр'еры храма з'явіліся тры драўляныя алтары ў стылі позняга класіцызму, сцены былі ўпрыгожаны велічнымі фрэскамі з біблейскімі сюжэтамі. У выніку гэтых змен вонкавы выгляд храма стаў спалучаць у сабе элементы неабарока і неакласіцызму.

З 1905 па 1909 гады пры храме дзейнічаў Дом сясцёр-манашак. Касцёл Найсвяцейшай Тройцы вядомы таксама тым, што нават за савецкім часам тут служылі езуіты і касцёл не быў зачынены. З 2009 года ў касцёле служаць парафіяльныя святары.

Гэта вельмі прыгожы касцёл, упрыгожаннем якога з'яўляюцца вежы рознай вышыні, прыгожы ганак. Ён знаходзіцца ў выдатным стане, будынак выглядае вельмі прыбрана. Ва ўнутраным інтэр'еры з цікавасцю разглядаеш біблейскія сюжэты пад купалам, цікавыя арачныя скляпенні. У сценах храма на адным з бакавых алтароў захоўваецца цудатворны абраз Маці Божай Індурскай. Тэрыторыя храма вельмі дагледжана: прыгожая каменная агароджа, тут размешчаны біблейскія скульптуры, слупы-каплічкі.

Характэрны факт, што да свята Вербнай нядзелі тут па-майстэрску ствараюцца ўнікальныя букеты з вярбы, якія ўпрыгожваюцца кветкамі, травой і каласкамі. Гэтае мастацтва прызнана элементам нематэрыяльнай культурнай спадчыны Беларусі і ахоўваецца дзяржавай.