Збляны. Царква Пакрава Прасвятой Багародзіцы

У Лідскім раёне на самым беразе ракі Нёман, знаходзіцца невялікая вёска Збляны, у якой пражывае каля ста чалавек. У цэнтры вёскі ўзвышаецца мураваны праваслаўны храм Пакрава Прасвятой Багародзіцы.

Упершыню гістарычныя крыніцы ўзгадваюць гэтае мястэчка ў 15 стагоддзі ў сувязі з падзеямі часоў караля Казіміра. У тыя часы Збляны належылі Вялікаму князю Літоўскаму. У 16 стагоддзі мястэчка перайшло да новых гаспадароў да магнатаў Радзівілаў. У першай палове 17 стагоддзя тут было 62 двара, уніяцкая царква і карчма. У сярэдзіне 17 стагоддзя мястэчка моцна пацярпела ў час вайны паміж Рэччу Паспалітай і Царствам Маскоўскім. У другой палове 17 стагоддзя Людовіка Караліна Радзівіл, якая была вядомай мецэнаткай, фундавала ў Зблянах пабудову праваслаўнай царквы. Пасля трэцяга падзелу Рэчы Паспалітай гэтыя землі перайшлі да Расійскай імперыі. У пачатку 19 стагоддзя гэтым краем валодаў Дамінік Радзівіл, а потым яго дачка Стэфанія. Пасля шлюбу Стэфаніі з Львом Вітгенштэйнам мястэчка перайшло да новых гаспадароў  Вітгенштэйнаў, якія былі аднымі з найбольш заможных памешчыкаў у Расійскай імперыі. Пасля забароны ўніяцкай царквы ў 1839 годзе ўніяцкая царква перайшла да праваслаўных вернікаў. А ў 1900 годзе пабудавалі вялікі новы мураваны  Пакроўскі храм, які захаваўся да нашага часу.

Мураваную царкву было вырашана пабудаваць у 1897 годзе Віленскім губернскім камітэтам. Будынак узводзіўся за дзяржаўныя сродкі і грошы прыхаджан. Царква ўзведзена ў псеўда – візантыйскім стылі. Царква агароджана мураваным заборам.