Грудзінаўка. Сядзіба графскага роду Талстых.

Сядзіба была пабудавана ў канцы 18 - пачатку 19 стагоддзя. Першы ўладальнік сядзібы Дзмітрый Аляксандравіч Талстой, атрымаўшы землі ад Кацярыны 2, заснаваў тут свой фамільны маёнтак. Апошняй уладальніцай сядзібы ў Грудзінаўцы была графіня Аляксандра Рыгораўна Талстая. На ўласныя сродкі яна пабудавала і ўтрымлівала каля Грудзінаўкі Рыжкоўскую бальніцу, якая захавалася да нашага часу.

Сёння графскі дом роду Талстых знешне захаваўся дастаткова нядрэнна. Мы бачым двухпавярховы будынак з купалам, калонамі, параднай лесвіцай і балконам з відам на парк і фантан. Да будынка прымыкаюць два аднапавярховыя крылы.

Побач з сядзібай Тоўстыя разбілі парк са старажытнымі дубамі, хвоямі, туямі, ліпамі і сажалкай у самым цэнтры. Сярод дрэў можна знайсці і сібірскі кедр. Аднак зараз парк зарос, многія дрэвы загінулі. А яшчэ ў 1963 годзе грудзінаўскаму парку быў нададзены статус помніка прыроды і садова-паркавага мастацтва рэспубліканскага значэння.

У час Вялікай Айчыннай вайны ў будынку сядзібы быў шпіталь. Пасля вайны тут знаходзіліся ў розныя часы сярэдняя школа, школа-інтэрнат, санаторый для дзяцей. рэўматызмам.

Унутры часткова захаваліся элементы ўбрання сядзібы прадстаўнікоў графскага роду. Аркі, калоны, масіўныя парэнчы, светлая плітка. Месцамі захавалася гіпсавая столь з арыгінальнай ляпнінай, упрыгожаная перакрыццямі і бэлькамі.

З савецкіх часоў, калі тут былі сацыяльныя ўстановы, на сценах захаваліся характэрныя малюнкі сацыялістычнай тэматыкі - чырвоныя зоркі, сцягі, серп і молат.

Увогуле, нажаль, сядзіба знаходзіцца ў жаласным стане, год за годам губляючы сваю першародную прыгажосць. Застаецца толькі спадзявацца, што яна ўсё ж абавязкова дачакаецца рэстаўрацыі.

А пакуль дадзенае месца рэкамендую да наведвання аматарам закідак)