Баркалабава. Царква Казанскай Божай Маці.

У мястэчку Баркалабава, што паміж Магілёвам і Быхавам, ёсць некалькі аб'ектаў гісторыі, якія варта паглядзець. Калісьці тут быў драўляны замак, ад яго засталася Замкавая гара, або, як яе тут называюць – гарадзішча; адноўлены ў апошнія гады праваслаўны Вазнясенскі манастыр; а ў самым цэнтры мястэчка ўзвышаецца праваслаўная царква Казанскай Божай Маці.

Калі будзеце заязджаць у Баркалабава з боку Магілёва, то яшчэ здалёку ўбачыце высокую званіцу царквы Казанскай Божай Маці, якая знаходзіцца на галоўнай вуліцы Дзянісава. Царква пабудавана ў 1904 годзе ў псеўдарускім стылі. Гэта тыпавы праект, па якім будаваліся тысячы храмаў у Расійскай імперыі. Некалькі такіх будынкаў засталося і ў Беларусі.

Царква пабудавана з чырвонай цэглы. Уваход аформлены ў выглядзе рундука, які трымаецца на чатырох слупах - "дыньках". Складаецца царква з некалькіх асноўных частак: бабінец, трапезная, малітоўная зала з бакавымі прыдзеламі і пяцігранная апсіда. Над бабінцам шмат'ярусная Званіца. Галоўны і бакавыя фасады аздоблены дэкорам з цэглы.

Царква ў савецкія часы была зачынена, а Званіца знесена. У апошнія гады храм перададзены вернікам і праведзена рэстаўрацыя. Храм дзейнічае.

Каля царквы з левага боку, знаходзіцца каменны двухпавярховы будынак царкоўна-прыходскай школы.