Ганчары. Пакроўская царква

Па шляху з Бярозаўкі на Ліду ёсць вёска ганчары, і ў цэнтры гэтага пасёлка пабудавана драўляная Пакроўская царква.

Храм узведзены на старых могілках у 1774 годзе. Спачатку будынак належаў уніятам, бо ў тыя часы, у канцы 18 стагоддзя ў Вялікім Княстве Літоўскім большая частка насельніцтва вясковага была ўніяцкая. Іх яшчэ называюць грэка-каталікі. А пазней храм у 19 стагоддзі перайшоў да праваслаўных вернікаў, калі ў 1839 годзе на Полацкім саборы была скасавана Унія.

Будынак трохнефны, пабудаваны ў стылі беларускага народнага дойлідства. Цэнтральны неф узвышаецца над бакавымі нефамі. Спачатку царква мела натуральны выгляд дрэва, а потым яе пафарбавалі. Над бабінцам пабудавана вежа-званіца. Складаецца з трох ярусаў-васьмярык на чацверыку, і завяршае вежу купал цыбуліна з каваным крыжам.

Над алтарнай часткай царквы таксама маецца невялікі васьмігранны барабан з цыбулінай. Будынак вертыкальна ашаляваны. На галоўным фасадзе і бакавых сценах прамавугольныя вокны.

Раней каля храма была драўляная вежа - званіца, якая была ў два ярусы-да нашага часу не захавалася.

У апошнія гады ў царкве праведзены рамонт. Царква мае статус помніка архітэктуры.