Мінойты. Касцёл Сэрца Ісуса і Святога Андрэя Баболі.

Па шляху з Ліды на Бярознаўку ёсць старажатнае мястэчка Мінойты. Калі крыху ад'ехаць у бок ад трасы, то пабачыце драўляны каталіцкі касцёл Найсвяцейшага Сэрца Ісуса і Святога Андрэя Баболі.

Пасля Рыжскага міру 1921 года мястэчка апынулася ў складзе польскай дзяржавы і ў гэты час ў Мінойтах арганізаваліся каталіцкія вернікі. Пачалося будаўніцтва каталіцкага касцёла з 1927 года. Першапачаткова касцёл атрымаў статус філіі пры парафіі ў Лідзе. З 1929 годза пры касцёле дзейнічала самастойная парафія. Новы касцёл быў асвячоны ў ліпені 1929 года і мае двайны тытул.

У савецкія часы каталіцкая святыня не зачынялася, хаця мясцовы ксёнз быў не заўсёды.

 Будынак касцёла прамавугольны ў плане. Накрыты двухсхільным дахам. Дах металачарапічны. Над уваходам пабудавана двухярусная чацвярыковая вежа - званіца, якая завершана высокім шпілем. Да галоўнага фасада прыбудаваны невялікі прытвор. Над алтаром надбудавана сігнатурка.

Інтэр'ер падзелены на тры нефа. Маецца тры алтары. Галоўны алтар прысвечаны Найсвяцейшаму Сэрцу Пана Езуса, бакавы - Святому Андрэю Баболі. Трэці алтар знаходзіцца ў каменнай капліцы, якую ўзвялі ў 1990 – х гадах і асвяцілі ў гонар Святой Сям'і.

Побач пабудавана металічная вежа – званіца.