Дзятлава. Спаса – Праабражэнская царква

Першая праваслаўная царква ў Дзятлава была заснавана яшчэ ў 16 стагоддзі. Фундатарам храма быў князь Канстанцін Астрожскі. Вялікі гетман Літоўскі Канстанцін Іванавіч Астрожскі (1460 – 1530) – ваенны і дзяржаўны дзеяч, мецэнат. У час пажара гэтая драўляная царква згарэла і на яе месцы ў пачатку 18 стагоддзя ўзведзены драўляны храм у выглядзе карабля. Царква была асвечана, як Спаса – Праабражэнская.

Будынак царквы ўзведзены ў традыцыях беларускага народнага дойлідства. У плане храм прамавугольны – гэта працяглы па падоўжанай восі зруб, які мае пяцігранную апсіду. Каля апсіды па яе бакам рызніцы. Зруб накрыты двухсхільным дахам. Над цэнтрам храма васьмігранны барабан і цыбуліна. Сцены царквы гарызантальна ашаляваныя. У бакавых сценах будынка прамавугольныя вокны, якія закрываюцца стаўнямі.

Некалькі год таму побач са старой царквой быў узведзены новы мураваны храм, які асвяцілі, як Сабор новамучанікаў і іспаведнікаў Царквы Рускай.  Яшчэ ў 1907 годзе быў распрацаваны праект новай царквы, які зацвердзіў Сінод. Быў закладзены падмурак новага храма, але пачатак Першай сусветнай вайны перашкодзіў будаўніцтву. За польскім часам у 1935 годзе пачалася распрацоўка новай царквы, але пачатак вайны зноў перашкодзіў задуме. У 1993 годзе архітэктар Л. Макарэвіч распрацаваў новы праект і некалькі год таму царква была дабунавана.