Дварэц. Пакроўская царква

Упершыню мястэчка Дварэц упамінаецца ў гістарычных крыніцах у 15 стагоддзі. Спачатку мястэчка належыла Фёдару Доўгалдавічу, а потым Свідрыгайле і канцлеру М. Кезгайле.

 У часы Вялікага княства Літоўскага будуецца драўляная ўніяцкая царква. Храм быў з адным купалам і высокай званіцай. Пасля анцірасійскага паўстання ў 1830 – 1831 гадах царкву перадалі праваслаўным вернікам. Потым гэту царкву разабралі і перанеслі на могілкі, дзе яе выкарыстоўвалі, як капліцу. У час пажару капліца была знішчана.

У 1866 годзе на месцы былой уніяцкай царквы будуецца мураваная праваслаўная царква якую асвяцілі ў гонар Пакрава Прасвятой Багародзіцы. Грошы на новую царкву выдзеліла дзяржаўная казна. Праект храма быў распрацаваны губернскім архітэктарам Міхайлоўскім. Будаўніцтва будынка працягвалася з 1866 года па 1869.

Царква пабудавана ў псеўда – рускім стылі. Складаецца з чатырох асноўных частак: прытвор, трапезная, малітоўная зала і апсіда. Над прытворам двухярусная вежа – званіца, накрытая гранёным купалам. Асноўны аб'ём прамавугольны, накрыты двухсхільным дахам з светлавым барабанам і цыбулінай. Царква агароджана мураваным заборам з брамай.

У мястэчку захаваліся старыя хрысціянскія могілкі і парэшткі вадзянога млына.