Дабраўляны. Сядзіба Гюнтэраў

У мястэчку Дабраўляны Смаргонскага раёна захаваліся парэшткі сядзібы Гюнтэраў – парк з сажалкай і мураваныя гаспадарчыя пабудовы з каталіцкай капліцай. Сядзіба і палац у Дабраўлянах былі пабудаваны ў часы Вялікага Княства Літоўскага ў 18 стагоддзі. Тады гаспадарамі тут былі Сангушкі.

Потым мястэчка стала ўласнасцю роду Гюнтэраў. У 1824 годзе граф Адам Гюнтэр залажыў падмурак новага палаца ў мястэчку. У гэты час пры сядзібе ўтварылася культурна – асветніцкае асяроддзе, мелася вялікая бібліятэка, прыязжалі ў госці вядомыя літаратары і пісьменнікі. Гэтыя падзеі былі апісаныя ў мемуарах дачкі гаспадароў Альбіны Габрыэлі Пузыны з рода Гюнтэраў. У 1851 годзе А. Гюнтэр падзяліў маёмасць паміж трыма сваімі дачкамі. Гаспадарыць пачала ў Дабраўлянах Мацільда Гюнтэр. Вясной 1862 года і да зімы 1864 года у сядзібе хаваўся ад паліцыі вядомы беларускі пісьменнік Вінцэнт Дунін – Марцінкевіч.

 Палац моцна пацярпеў у час Першай сусветнай вайны. Палац і сядзіба ў Дабраўлянах  паводле мясцовай легенды апісаны ў творы «Пракляты» пісьменніка Ігната Ходзькі.

Парк у рэгулярным стылі быў закладзены ў 18 стагоддзі. Каля парка праходзіў водны канал. У парку праізрастаюць пераважна мясцовыя віда дрэваў і кустарнікаў: клён, ліпа, асіна і алешына, чаромха, дзёран і іншыя расліны.