Свір. Замкавая гара, або Гарадзішча.

У старажытным мястэчку Свір Мядзельскага раёна знаходзіцца некалькі помнікаў архітэктуры і даўніны. Архітэктурнай дамінантай з'яўляецца каталіцкі касцёл Святога Мікалая.

        Але калі вы захочыце пабачыць усю панараму мястэчка і само вялізнае возера Свір, то вам трэба забрацца на мясцовую Замкавую гару, або яшчэ гэты помнік археалогіі называюць Гарадзішча, і яшчэ ёсць адна назва – Даўмонтава гара.

           Каб вам забрацца на Гарадзішча, неабходна апрануць зручны абутак. А знайсці помнік вельмі проста, бо ён знаходзіцца ў цэнтры мястэчка на перакрыжаванні цэнтральных вуліц Савецкай і Наберажнай.

            Свірскі замак па меркаванню некаторых даследчыкаў існаваў у 13 – 16 стагоддзях у эпоху Вялікага Княства Літоўскага. Замак быў рэзідэнцыяй князей Свірскіх.

        Вядомыя і аўтарытэтныя гісторыкі Мацей Стрыйкоўскі ў 16 стагоддзі, гісторык Феадосій Сафановіч ў 17 стагоддзі і Адам Ганоры Кіркор ў 19 стагоддзі выказвалі думку, што заснавальнікам мястэчка Свір і замка быў князь Даўмонт, легендарны нальшанскі князь. Лічыцца, што Даўмонт пабудаваў свой замак на месцы паганскага капішча, дзе быў Пярун. Замкавыя ўмацаванні былі ўзведзены з дрэва.

      Ёсць недалёка каля мястэчка гара пад назвай «Паклоніха», дзе купцы і праезжыя людзі павінны былі біць паклоны князю, каб дазволіў спыніцца пад абаронай Свірскага замка. Значэнне замка ў Свіры значна паменшылася пасля пабудовы князем Гедымінам мураванага замка ў Крэва і Лідзе.