Усава. Капліца Рэйтанаў.

      У Капыльскім раёне ёсць невялікае мястэчка Усава. Калісьці тут была сядзіба Рэйтанаў, а потым роду Плятэраў. На самай ускраіне мястэчка да нашага часу захавалася мураваная каталіцкая капліца Рэйтанаў.

        Храм каменны з цэглы, узведзены ў стылі класіцызму. У плане мае чатырохвугольнік. Крыты двухсхільны дах. Над галоўным фасадам размяшчаецца трохвугольны франтон.

          Храм пабудаваны і асвечаны ў часы Расійскай імперыі ў 1863 годзе. Пасля антырасійскага паўстання 1863 – 1864 гадоў набажэнствы ў капліцы не праводзіліся.

         Адрамантаваны будынак у 1898 годзе. Асвечана ксяндзом Далецкім. Узімку 1900 года быў атрыманы дазвол на правядзенне ў капліцы набажэнстваў. Дазвол быў дадзены Міністэрствам унутраных спраў Расійскай імперыі. 

          Сядзіба належала ў 19 стагоддзі роду Рэйтанаў. Лічыцца, што менавіта ў гэтай капліцы быў пахаваны Станіслаў Рэйтан і яго жонка Саламея.

     Станіслаў Рэйтан (1781-1863) - палітычны і грамадскі дзеяч, літаратар. Вучыўся ў Вільні і служыў у войску. Пасля вайны з французамі ў 1813 годзе жыве ў Слуцкім уездзе. У 1840 годзе быў абраны маршалкам Слуцкага павета. Быў ганаровым куратарам Слуцкай гімназіі.

Паводле некаторых звестак, незадоўга да смерці Рэйтан сваю сядзібу ў мястэчку Усава перадаў пад лякарню. Дзяцей у яго з жонкай Саламеяй не было. Пісаў мастацкія творы і мемуары. Друкаваўся ў газетах і часопісах.

      Потым гаспадарамі ў сядзібе Усава былі Плятэры. Палац быў аднапавярховы драўляны ў стылі класіцызму. Ад сядзібы нічога не засталося.