Васільчыцы. Успенская царква.

У Капыльскім раёне ў мястэчку Васільчыцы ёсць помнік архітэктуры драўляная праваслаўная Успенская царква. Храм знаходзіцца ў самым цэнтры Васільчыцаў на перакрыжаванні цэнтральных дарог.

         У мястэчку ў пачатку 19 стагоддзя была вядома першая царква, якая належыла ўніяцкім вернікам. Храм, мабыць, быў пабудаваны яшчэ ў часы Вялікага Княства Літоўскага. Пасля забароны ўніяцтва ў Расійскай імперыі ў 1839 годзе царкву перадалі праваслаўным вернікам. Святыню асвяцілі ў гонар Апостала Іаана Багаслова.

        З пісьмовых крыніц вядома, што ў 1864 годзе ў Васільчыцах была царква. Царква была прыпісана да Нікольскага храма ў суседнім вялікім мястэчку Цімкавічы. Толькі не вядома – гэты была новая царква, або былая ўніяцкая.

       Успенская царква узведзена ў другой палове 19 стагоддзя ў часы Расійскай імперыі.  У часы савецкай улады ў 1930 – я гады святыню зачынілі. Будынак прыстасавалі пад мясцовы клуб.

        У гады Вялікай Айчыннай вайны царква зноў пачала працаваць. Храм зноў зачынілі ў 1969 годзе ў тут было зроблена зернесховішча. Паступова помнік прыходзіў у занядбаны стан.

       У канцы 1990 – х гадоў пачалася рэстаўрацыя святыні. У 1999 годзе прыход быў афіцыйна зарэгістраваны. Восенню 2004 года адбылося асвячэнне царквы. Асвяціць храм прыехаў мітрапаліт Мінскі і Слуцкі Філарэт, Патрыяшы Экзарх усея Беларусі.

             Помнік народнага драўлянага дойлідства. Будынак узведзены на каменным падмурку. Складаецца з трох асноўных частак: прытвор, малітоўная зала і апсіда. Над прытворам надбудавана васьмігранная вежа – званіца. Над асноўным аб'ёмам узведзены невялікі купал – цыбуліна на васьміграным барабане.