Цімкавічы. Мемарыяльная капліца.

        Мястэчка Цімкавічы Капыльскага раёна мае старажытную і багатую гісторыю. Упершыню ўпамінаецца з 15 стагоддзя з часоў Вялікага Княства Літоўскага. Тут захавалася некалькі помнікаў архітэктуры і даўніны.

          У самым цэнтры мястэчка знаходзіца праваслаўная Мікольская царква. Сам старажытны храм не захаваўся, але побач з царквой ёсць мураваная двухярусная званіца і мураваная мемарыяльная капліца 19 стагоддзя.

         Капліца па сваёй архітэктуры вельмі простая. Але мае вялікую значнасць тое, у гонар чаго яна была пабудавана. Капліцу пабудавалі ў гонар адмены прыгоннага права ў Расійскай імперыі ў 1861 годзе. На капліцы захавалася мемарыяльная шыльда з надпісам і манаграмай імператара Аляксандра ІІ, які адмяніў прыгон у Расіі.

    Помнік узведзены ў другой палове 19 стагоддзя ў стылі неакласіцызму. Будынак цэнтрычны, у плане квадратны. Накрыты чатырохсхільным дахам. Над уваходам у капліцу знаходзіцца памятная шыльда з надпісам. У апошнія гады капліца была адрамантавана.

       У Цімкавічах захаваліся падмуркі і крыпта каталіцкага касцёла 17 стагоддзя Святога Міхаіла Архангела. Касцёл меў унікальныя роспісы. Помнік загінуў у час пажару ў 1985 годзе.

         У Цімкавічах была сядзіба, якая вядома з часоў Вялікага Княства Літоўскага. Спачатку тут гаспадарамі былі Алелькавічы, потым Хадкевічы, Сапегі і Радзівілы. Ад сядзібы захаваўся вялікі мураваны бровар.

       Цімкавічы – гэта радзіма класіка беларускай літаратуры Кузьмы Чорнага (1900 – 1944). Тут прайшлі юнацкія гады пісьменніка і зараз працуе літаратурны музей.