Славенск. Царква Святога Мікалая

Мястэчка Славенск знаходзіцца на беразе ракі Заходняя Бярэзіна недалёка ад Валожына. У цэнтры мястэчка ўзвышаецца мураваная праваслаўная царква.

Храм асвяцілі ў гонар Святога МІкалая. Царква пабудавана ў 1868 – 1871 гадах. Будынак мураваны з цэглы, атынкаваны і пабелены. Узведзены ў псеўда – рускім стылі па тыпавому праекту.

Пасля падаўлення трэцяга анцірасійскага паўстання на гэтых землях пасля падзелаў Рэчы Паспалітай, якое адбывалася ў 1863 – 1864 гадах, пачалося масавае будаўніцтва на землях Беларусі невялікіх праваслаўных храмаў па тыпавым праектам. Вось і гэты будынак узведзены па такому праекту.

 Храм пабудаваны па кананічнай кампазіцыі і мае чатыры асноўныя часткі: прытвор, трапезная, малітоўная зала і апсіда. Над прытворам надбудавана двухярусная вежа – званіца васьмярык на чацвярыку, якая завершана высокім шпілем з цыбулінай. Да пратвора прыбудаваны ў выглядзе арачнага партала з кілепадобным завяршэннем галоўны ўваход. Трапезная мае двухскатны дах. Асноўны аб'ём малітоўнай залы накрыты пакатым чатырохсхільным дахам на версе якога васьмігранны барабан з цыбулінай. Архітэктурны дэкор і пластыка запазычаны ў старажытнарускіх храмах. Будынак узведзены на падмурку з бутавага камяня.

 Вакол царквы мураваная агароджа і брама. З права ад брамы знаходзіцца старажытны каменны крыж.