Вішнева. Касцёл Наведвання Прасвятой Дзевы Марыі.

Гісторыя

Каталіцкі прыход у Вішневе заснаваны ў XV стагоддзі вялікім князем Вітаўтам, у 1424 годзе тут быў пабудаваны драўляны касцёл на сродкі Пятра Сянькі Гедыгольдавіча. Каменны храм на яго месцы быў узведзены ў 1637-1641 гадах на сродкі наваградскага ваяводы Ежы Храптовіча. Заснавальнік храма быў пахаваны ў крыпце. Касцёл асвечаны ў гонар Наведвання (сустрэчы Марыі і Елісаветы) у 1675 годзе біскупам Слупскім. У 1771 годзе храм быў адноўлены пасля пажару на сродкі А. Храптовіча, падчас аднаўлення да алтарнай часткі былі прыбудаваны рызніцы, якія адсутнічалі да таго. У 1906 годзе касцёл падвергся яшчэ адной перабудове — быў прыбудаваны вузкі нартэкс у псеўдабарачным стылі, бязвежавы да таго фасад быў увянчаны дзвюма невялікімі квадратнымі вежамі. У савецкі перыяд храм не закрываўся. З 1953 г. службы вядуцца на беларускай мове.

Архітэктура

Храм Наведвання Найсвяцейшай Панны Марыі - аднанефны храм з паўкруглай апсідай і нізкімі бакавымі рызніцамі. Фасад трох'ярусны, верхні ярус сфарміраваны чатырохграннымі вежамі і фігурным шчытом паміж імі. Скляпенні ўпрыгожаны ляпным дэкорам XVII стагоддзя. Паліхромны роспіс скляпенняў і пілонаў выкананы мастаком Фердынандам Рушчыцам. Галоўны алтар выкананы з дрэва ў XVIII стагоддзі, дэкараваны скульптурамі і разьбянымі ўзорамі. У цэнтральнай частцы алтара — абраз Маці Божай. На ўсход ад храма размешчаны вароты, якія таксама выконваюць функцыю званіцы. Пабудаваны ў другой палове XIX стагоддзя. Над шырокім арачным праходам размешчаны тры праёмы са званамі, увянчаныя трыма невялікімі франтонамі.

Касцёл з'яўляецца помнікам архітэктуры, унесеным у Дзяржаўны спіс гісторыка-культурных каштоўнасцей.