Руда Яварская. Касцёл Святога Іосіфа

Мястэчка Руда Яварская было заснавана на беразе невялікай рачулкі Пад'яваркі. Гэтыя мясціны ў 18 стагоддзі належалі магнатам Радзівілам і тут здабывалі балотную руду. Радзівілы валодалі гэтым рудніком і мясцовым дваром Явар, ад якога і пайшла назва мястэчка. Затым гаспадарамі маёнтка сталі Іваноўскія.

Пасля Рыжскага міру 1921 года гэтыя землі перайшлі да Польскай дзяржавы і ў 1936 годзе быў пабудаваны каталіцкі касцёл. Асвяцілі храм у жніўні 1937 года.

У 1939 годзе, як прыйшла савецкая ўлада, касцёл перадалі праваслаўным вернікам. Царква тут працавала да 1976 года. Затым будынак перайшоў пад патрэбы мясцовага калгаса і тут зрабілі складское памяшканне. У апошнія гады існавання СССР у 1989 годзе касцёл вярнулі каталіцкім вернікам. Быў праведзены рамонт.

Будынак драўляны, склдаецца з прамавугольных зрубаў: бабінец, асноўны аб'ём малітоўнай залы і пяцігранная апсіда з бакавымі сакрысціямі. Над бабінцом надбудавана чацвярыковая вежа – званіца, якая накрыта шатровым дахам. Алтарная частка касцёла накрыта вальмавым дахам над якой знаходзіцца невялікая шатровая вежа на чацвярыковым барабане. У інтэр'еры маюцца хоры, якія трымаюцца на чатырох слупах.