Рэпля. Касцёл Прасвятой Дзевы Марыі

Сваю гісторыю мястэчка Рэпля пачынае з 16 стагоддзя. Гаспадарамі за гэтыя стагоддзі тут былі многія вядомыя ўладальнікі: Адахоўскія, Ясенскія, Масальскія, Сцыпіёны і Валовічы. У пачатку 17 стагоддзя заснаваны першы каталіцкі прыход і пабудаваны драўляны касцёл. У 1731 годзе гетман Міхал Масальскі фундаваў новы касцёл.

У 1902 – 1909 гадах у мястэчку пабудаваны мураваны каталіцкі касцёл, які асвяцілі ў гонар Прасвятой Дзевы Марыі.

Будынак узведзены ў стылі неаготыкі. Галоўны фасад упрыгожаны двумя шматяруснымі тэлескапічнымі вежамі. Першы ярус вежаў чацвярыковы, а другі васьмігранны. Завяршаюцца вежы шатрамі.

 Паміж вежамі знаходзіцца ступенчаты шчыт з пінаклямі. Такі ж шчыт размяшчаецца і над апсіднай часткай храма. Галоўны ўваход знаходзіцца ў цэнтры фасада. Над уваходам акно – ружа. На бакавых фасадах аконныя праёмы, паміж якімі контрфорсы. Асаблівай прыгажосці храму надае кантраст чырвонай цэглы з белай тынкоўкай. Інтэр'ер падзелены на тры нефы. Маецца некалькі неагатычных драўляных алтароў і амбон, які раней выкарыстоўваўся для казанняў.

Касцёл абнесены па перыметру мураванай агароджай з бутавага камення. У апошнія гады касцёл быў адрамантаваны.