Парэчча. Царква Святога Георгія.

У мястэчку Парэчча Слонімскага раёна на берагу ракі Шчара пабудавана мураваная праваслаўная царква, якую асвяцілі ў гонар Святога Георгія. Мястэчка Парэчча ўпершыню ўзгадваецца ў гістарычных крыніцах у 17 стагоддзі ў эпоху Вялікага Княства Літоўскага. 

У 1647 годзе мястэчка было ўласнасцю Гераніма–Андрэя Талькі ў Слонімскім павеце. Першая драўляная царква была пабудавана ў 17 стагоддзі па фундацыі Валовіча.

 У часы Расійскай імперыі ў 1842 годзе ў час пажару старая ўніяцкая царква згарэла. Набажэнствы сталі адбывацца ў капліцы на могілках.

ў 1867 годзе была пабудавана мураваная праваслаўная царква на месцы старой царквы, якая належыла ўніяцкім вернікам. У савецкія часы царкву зачынілі і памяшканне было прыстасавана пад склад. У 1970 – я гады ў час пажара царква была моцна пашкоджана. Напрыканцы існавання СССР будынак вярнулі вернікам і быў распачаты рамонт.

Царква пабудавана ў рэтраспектыўна – рускім стылі з бутавага камяня і цэглы. Складаецца з кананічных чатырох асноўных архітэктурных частак: прытвор, трапезная, малітоўная зала і апсіда. Над прытворам узведзена вежа – званіца васьмярык на чацвярыку.