Пашукі. Царква Андрэя Першазваннага

Паміж раёным цэнтрам Камянец і нацыянальным паркам Белавежская пушча знаходзіцца мястэчка Пашукі. На трасе, якая вядзе на Каменюкі ў пушчу, на супраць мясцовых могілак, пабудавана драўляная праваслаўная царква ў гонар Святога Андрэя Першазваннага.

 Першая царква ў мястэчку Пашукі была пабудавана ў 1609 годзе. Па фундацыі Пац Агаф'і – Соф'і узведзены храм у гонар Раства Багародзіцы. Праз 150 год узведзены новы храм, які асвяцілі ў гонар Святога Ануфрыя.  А ў 1877 годзе будуецца новая царква ў гонар Святога Андрэя Першазваннага. Будынак быў узведзены будаўнікамі з мястэчка Белавежа, што знаходзіцца недалёка ад Камянецкага раёна на тэрыторыі сучаснай Польшчы. У савецкія часы ў 1961 годзе царкву зачынілі і будынак прыйшоў у заняпад. У 1995 годзе пасля рамонту царква зноў пачала працаваць.

 Царква пабудавана ў псеўда – рускім стылі і складаецца з чатырох асноўных частак: прытвор, трапезная. Малітоўная зала і апсіда. Над прытворам надбудавана двухярусная вежа – званіца. Васьмярык на чацвярыку і завершана высокім шматгранным шпілем з цыбулінай. Галоўны ўваход аформлены казырком з трохвугольным франтонам і трымаецца на двух драўляных слупах. Трапезная накрыта двухскатным дахам. Асноўны аб'ём царквы мае форму квадрата і накрыты чатырохскатным дахам з васьмігранным барабанам з цыбулінай. Да малітоўнай залы прыбудавана трохгранная апсіда.